Hjemm fræ

---

Johan Skjoldborg: Dynæs Digte (1915)
Oprindelsesland: Danmark
Tilgængelige tekster af samme forfatter her


(HANNÆSBOMÅL - VED SPROGSKELLET)

A howe godt mi bette Ti

we Fåes å Mues Håend,

wor Huws i Læ we Præjstens Haww

å tæt we Fywestråend.

 

En Stråend, dæ gjik fræ Gorbækshag’

å uwd i Hollemtång;

den Stråend i Bowt å Wigh a wild’

mæ ajer nødde prånng.

 

Stienpekkern ga sæ wåndt for Ægg

mell Skrabskjæl å broged’ Stien,

å Rylen klawed sæ å rend

po hinne Rångel-Bien.

 

Men Fywren den wa no de bæjjst;

sin a wust op til Mand,

a oller hår en Fywer sit

som uwd for Øsløs-Land.

 

Den skjywter gal å gue, som Folk

di skjywter Sindlaw te;

a tøgges oller, a hår sit

nøj Wond så wild som de!

 

Å manne skjønn Ting hår a sit,

som Suelen skjennt epo,

men oller hår a sit nøj Wond

som de så blånk å blo.

 

Di skjønnest Lannd’, te a weed o,

ku sies fræ wo Stråend,

Lyw å Fuwr å Hemmerland

å Mohs po hywer Håend.

 

Å oll di Skjib, dæ sejlt fobi,

å Feskebohd i Råend

når de tow uwd fræ Øsløs-Land

en Sommer-Awtenståend.

 

Dæ gjik i Fywesih’ wi Knæjt’

å wåjed låndt å læng,

Jens Skrædders Jenns å Sørens Nihls

å oll di ajer Drænng.

 

Wi wåjed møj, wi fesked Ræ,

o Kræbs dem fæk wi nøij,

den Ti Mads Towdal gjik mæ Glijb

å Pier han browt æ Krøij.

 

We Fywren uwnt wi, å wi sow

we Sjøngen å we Suws.

A howe godt mi bette Ti,

mi Fåes å Mues Huws.